Mairee Maan kay Mujh say Aakhri Alfaaz

Dear Friends….This is the Urdu language version of My Mother’s Last Words To Me originally posted here. On request of those who don’t enjoy English I have written it in ‘Roman Urdu’ (I will be updating shortly in Urdu script also). This is also for the benefit of  those in other parts of the world who understand the language phonetically but cant read the Urdu alphabet. May you be forever blessed with prayers of your mother. 

Mairee Maan kay Mujh say Aakhri Alfaaz

Mainay yeh apni waldaah kay guzarnay keh kuch din baad likha thaa, du aktoober unnees so unnaasee mein.

Jub say mein iss ko apnay paas lay kar phir raha hooN, yeh soch keh kay kia jo mainay likha hai woh sirf mairay apnay liyay tu nahee tha.

Ab jub uss raat kee yaad aik bhaar phir aik sailaab kee tarah mairay undar aarahee hai, mujhay lagta hai keh itnay barus kaa yeh bojh mujhay kamzor kar chukka hai.

Mujhay nahi pataa mein kub un say jaa milooN ga aur yeh sachi kahanee mairay saath mitti mai mil jaye gi.

Mumkin hai aap sub kay saath yeh share kar kay mein yeh bataa sakooN keh who kia khoob aurat theen. Aur yeh kay unkay dil aur zehan mein siwaye doosray shakhs kay koi nahi thaa.

Shaid mein yeh iss liye share karna chahtaa hooN….keh unkay akhri alfaaz saari dunya kay kanoN kay haqdaar haiN.

Khaas taur par baitoN kay liyay; kiyonkay hamaiN koi andazaah nahi hai keh aik maa kai dil mein kya ho raha hota hai, chahay hum bayttay jitna bhi yeh sumjhaiN kay hum apnay liyay apni maa kay jazbaat samjah saktay haiN. Jabkay hum nay inko samajhnay kee kohshish hee nahee kee hay.

Mein, Sohaib Alvi, aik baita jis nay bohat dair kar dee, aaj aapko kuch batana chahta hooN…

Mairee Maa kee mujh say aakhri baat

Aakhir kya kaha tha ammi naiN?

Suraj doob raha thaa jub mein uss ICU kay kamray mein pohncha jahaan Ammi bistar pay laitee mairay barhay bhai aur barhi behan ko daikh rahee theen.

Kuch din pehlay say Ammi kee awaaz na honay kay barabar thee. Woh koshish karteeN, laiken saans kee kamee unkay kahay ko wapiss neechay khaich laitee.

Woh har 3-4 secondoh kay baad, saanse kay liyay haamptee theen; aur hum say baat karna chahtee theen. Un ka mooN khulta aur madham see awaaz nikaltee; kafi dafa woh bhi nahee.

Mairay andar aatay hee unnhoon nai gurdan ghuma kay mujhay daikha aur jaisay hee mein jhukka unko gaal pay pyaar karnay kay liyay unnhoon nay mairee aankhoN mein daikh kar kuch bolna chaha.

MainaiN forun unko khamosh karanay kee kohshish kee thee, taakay unko bolnay kay liyay zor na lagaana parhay. Aisaa hota hai jub aap bohat jaldee mein hoN kissi koh khamosh karanay kay liyay; khaas taur par jub woh takleef mein ho.

Laiken mujhay ahsaas hua keh unkay alfaaz kanoN mein utar gaye haiN buss theek say baitthay nahi haiN kai forun samjah aa sakaiN; jaisay mairay zehen mein jaa kar kisi konaiN mein kharhay hoN.

Jaisay kisee gehri soch main mubtilaa kaheen say guzartay huay aap ko kaheen say aati kissi dhun ka ahsaas hua ho; jo uss waqt aaapnay ghor say na sunee ho. Magaar aap ko pata hai kay aap uss ko gungana saktay haiN uss lamhay mein wapis jaa kay iss say pehlay keh who hamiasha kay liyay fanah ho jaey.

Samajhiyay itna saa lamha jis mein aap ko ahsaas hota hai kay goli lagee tu hai magar abhi dard shru nahi hua.

Mujhay pata thaa keh ab woh jaarahi haiN aur bohat kum waqt mein woh hamaiN chorh jaiN gee. Magar yeh pata nahi thaa keh unn kee awaaz abb mujhey kabhi sunaee nahi dainay walee hai, jo chund din unkay rah gayae thay hamaray paas.

Peptic ulcer aur kaee aur paichaidgyoN say larhai larhtay huay, nauN saal kee aik lambi aur kathan aazmaish kay baad ammi baihad kamzori ho gaeen theen. Aur aisaa lagta thaa keh mazeed woh apni larhaee nahee larh sakaiN gee.

Iss kay bawojood unkee muskurahat unkay chaihray par rahtee thee. Aur jiss himmat say unhooN nay hum ko pala posaa thaa itnay masail kay hotay hauay, abhi bhi woh himmat kabhi kabhi nazar aati thee.

Magar mein daikh saktaa thaa keh woh sehmee huee haiN. Woh marrnaa nahee chahtee theen. Aur sirf iss liyay naheeN kay woh hum sub ko baipanah chahti theeN.

Woh unn logon mein say theeN jo chotee see baat par bhi khush hotay haiN aur logoN say baat cheet karna aur milna julna chahtay haiN.

UnhooN  naiN  iss  beemari  ko  itna khainch liya tha keh woh hum sub ka ghar busta daikh sakaiN.

Apni shadeed baimaree kai dauraan bhee woh apnay potay aur navasioN kay pass bhaitee rahteeN aur unkay saath khailtee rahteeN, siwayay mairay baqee do baitoN kay jo unn kay jaanay kay baad iss dunya mein aye; aur un say kabhi galay nahi lug sakay.

Aakhir unhooN naiN kaha kya ha? Kya woh chah rahee theen kay unki takleef kum ho?

 

Sub say chotay honay kay bais mainein unn kay saath sub say kum waqt guzaraa thaa; aur mairay bhai aur behan bohat khushqismat thay keh woh uss waqt barhay huay jub woh nizbatan ziadah mazboot-e-dil aur saihatmund theeN.

Woh Aazaadi-e-Pakistan kay baad aanay walay saaloN kee museebatoN aur marholoN ko jhailtay huay Saddar mein Preddy Street kee aik teen manzilla imarat kay ooparee hissay mein bhai aur apa ko liyay aa basee theen.

Yahan inn du kamroN kay flat mein jahan aik chotaa sehan bhi thaa, mairee dadi, mairay chachaa, chachi aur mairay kazunz saath rahtay thay.

Iss kay alawah Hindustan say kaee rishtaydaar iss sheher aur iss flat ko apnay aglay safar ka aarzee maqaam banatay huay yahan aa thairhtay thay. Sub Ammi ko dost, musheer aur moallim maantay thay auyr unkay aakhri waqt tuk maantay rahay.

Ammi Burtanveeh Raj kay aik senior bureaucrat kee baitee theen; aur chay saal kee theeN jub mairee naneeN ka intiqal ho gaya.

Ammi nay apni parhaee Lucknow, Dilli aur Simla mein kee (jo angraizee hukoomat ka summer capital tha aur jehaan mairay Nana government kay saath move hotay thay).

UnhaiN bachpan say hee funoon-e-latifa ka bohat shauq thaa. Dramay aur debates meiN hissa laiteeN theeN, sitar bhee bajati theen aur classical dance ko samajhtee theen.

Magar jaisay jaisay mairay walid Pakistan meiN aisaa kaam dhoondnay mein nakaam huay jehan unko sahafat aur sachaee kay saath samjhota naa karna parhay

—woh partition kay pehlay say hee sahafi thay, taleem yaafta aur intihai usoolpasand—

Waisay waisay mairee waldah nay apnay du banchoN kee achhee parwarish mein koi kasar nahi chorhi.

Unko uss waqt kay behtreen missionary schools mein parhaya; aur halankay unhooN naiN kabhi koi naukree nahi kee thee, khud teacher kee job kar kay mairay walid ka haath battaya.

Mein unki zindagee mein bohat dair say aaya, aur kabhi unko koi shikwa yah arzoo kartay nahi sunaa; bawojood iskay keh unka bachpun aur jawanee baihad aaraamdeh guzra tha.

Mairee waldah apnay college kay dinoN meiN angraizoN say azaadi kee movement kai doraan Muslim larkyoN kee tulbah-e-tehreek kee Secretary General theen. Aur Begum Sahista Ikranmullah kee baihad chaeetee.

Dawn akhbaar naiN sun 1943 mein chapnay waalee aik khabar mein unka zikar iss tarah kiya hai keh woj julsoN mein  Musalmaan waldainoN say iltija kartee theeN apni taqreeroN mein, keh apni baityoN ko azaadi kee tehreek mein bahar aanay kee ijazat daiN taakay Muslim girl students  bhi aik qoowat lagaiN.

Woh mairay walid say jo unkay rishtaydaar bhi thay aur khaandanoN ka milna julna bhi tha, bayhad mohabbat karti theeN.

Mairay walid aik shaandaar shakhsiyat kay maalik thay aur mairee waldah unkay sahafat kay jazbay say bohat mutassir theen, haalaan keh unkay pass na status, na daulat, na zaati jaidaad thee.

Phir bhi woh aur mairay walid apna saraa hissa apnay behan bhaiyoN kay hawalay chorh aye thay.

Aur halaaN kay yahaan Ammi ko paisoN kee hamaisha tangee rahi magar kabhi unhooN nay palat kay hissa nahi maanga na apnay dost ya rishtidaroN say kabhi kuch chaaha.

Saadgi say rahiN, jo mairay walid nai dya ussi say ghar chalaya jub tak kay mairay bhai aur behan parh likh kar naukri pay nahi lag gaye.

Mairay walid apni girti hui saihat ki wajah say kaam na jari rakh sakay thay…jubkai mairay bhai behan uss waqt parhaee kay akhri saal mein thay.

Woh aakhri waqt tuk mairay walid say pyaar karti theen jubkay mairay walid kee dunya unkay gird zeera zeera ho chukee thee.

Mairay liyay unkee sub say pehli yaadain aik hamaisha muskaranay waleeN aur itminan shudah khatoon kee raheeN jin ko har cheese aur har insaan mein kuch achaa hee nazar aata tha.

Mein abhi kuch haftoN ka hee thaa keh mairay walid naiN aik chota sa flat lay kiraye par lay liya thaa jo Tariq Road aur Cheel wali Kothi (yanaiN aaj kee Khalid bin Waleed Road) kay bilkul beach mein thaa.

Jub tuk unhooN naiN Morning News akhbaar aur Radio Pakistan mein kaam shru kar diya thaa laiken jo unko pata thaa woh uss waqt kay taaqatwar log sunna nahi chahtay thay.

Woh baar baar kohshish kartay thay shakhsiyaat aur tareekh ka sahee roop likhnay kay liyay. Magar unkay likhay huay ko daraaz mein daal diya jaata tha. Inn rawaeyoN say unko baihad sadmaa pohncha thaa.

Iss saaray waqt mein mairee waldah unkay zakham kay saath pattee bun kar rahti raheeN.

Woh saari yadain mairay saamnay say guzreeN jub mein unko bistar pay laittay apni aakhri saansaiN laitay huay daikh raha thaa, jo ziadahtar kuch rukao aur kuch kohshish kay saath woh khainch paatee theeN.

Jitna woh hotoN say kehna chahtee theen utna hee woh apni aankhon say kahti theeN. Unhoon naiN unn aakhri dinoN mein thorha saa moonh khula hee rakhaa kay aik second kee mohlat milay tu hum say kuch bol sakaiN.

Mairay kumray mein aatay hee unki aankhaiN uth jaagee theeN, jaisay aur baichaiN ho gaee hoN mujh say kuch kahnay kay liyay.

Kya kuch maanga thaa unhoon naiN? Pani chahiyay thaa? Ya aik aur dard ko dabaa dainaiN wala injection?

 

Mujhay tu yaad hee nahi keh unhooN nay mujh say kabhi kuch maanga ho, siwaey iskay keh neechay bazaar say kuch layao.

Woh saari khareedaari khud karti theen takay unkay bachay subh aur dupahair mein parh sakaiN.

Itwaar ki subh aik shoar ho raha hota thaa jub mairee aankh (aksar dair say) khulti thee.

Woh pooray khaandaan mein itni hardil aziz theeN keh sub unkay saath huns baithnay kay liyay, aur chai aur dilchusp baataiN karnay kay liyay, oopar aa jaatay thay; jub haftay bhar kee kaharidaari karnay uss taraf aatay.

Woh mairay hur cousin kee madad karti theeN; chahay unko samjhaana ho ya unn ki koi khwaish barhoN ko batana ho ya unko parhanaa ho.

Mairay aik barhay cousin haiN jo aaj tak kehtay haiN keh, ‘Humaira khalaa ki wajah say mein matric mein pass hua.’

Woh uss chotee see building kee beewioN kee hamaraaz theeN; jo unhay Humaira baji kehtay theeN.

Woh unkee dil kee batain sunti theeN aur sub khoob mazay lay kar unko apnay ghar kay yah apnay khud kay qissay bhee sunaatay theeN.

Mein bohat chota thaa laiken mujhay aisaa lagtaa tha keh jaisay sub unkay saath baith kar hee apni khushee paatay thay ya dil halka kartay thay.

Shaid iss liyay keh woh kabhi unki zaati zindagi par nukta cheeneeN nahi karti theeN; na kisi kee baat aagay kisi say kehtee theeN.

Jo bhee baat thee sub un par bharosa kartay thay; unhooN naiN kabhi kisi ka raaz na bola.

Kia kaha thaa unhoon Nain?? Kya kissi ko jaa kar koi zaroori baat batana thee? Kya woh mujh say koi apna aakhri kaam karwana chah rahi theen??

 

Mairay unkay paas akailay reh jaanaiN tuk andhaira ho chuka tha.

Meinain khirhki say aati hui narm chandnee ko unkee bund palkon par khamoshi say baitthtay daikha.

Mairay liyay unka har tarha ka pyaar mujhay yaad aanaiN laga.

Mairay saath school say waapis chal kay aana jub mein bohat chotta thaa; Kabhi apnay bachpan ki shaitanee kee aur kabhi koi kitaab say mujhay kahaniaN sunanaaN.

Apnee neend torh kar mujhay khaana daina agar mein khail kay dopahair ko dair say aooN. Ya raat ko dair tuk jaagna jub mujhay taiz bukhaar ho aur jub tuk mein so na jaooN.

MainaiN kursi pay sar rakha aur socha keh maynaiN tu unko kuch bhi waapis nahi dia. Buss kabhi-kabaar pass baithay koi baat kee, ya saath TV dekha, ya unko kahin laygaya; ya kabhi unkay saath baith kar kuch kha liya, jub parhai nahi kar raha hooN ya dostoN kay saath bahir na nikla hooN.

Mein unka takyay pay rakha sir daikhta raha. Unkee paishaanee par thorhee see bhi jumbish yeh ishara tha keh unkay undar koi baichaneeN hai.

Phir mainaiN aik lamha guzaraa jo mairay saath zindagi bhar rahai gaa.

Uss raat kee khamoshi mein ammi kay woh aakhri alfaaz aik dum say saamnay aagaye, jaisay keh raat ka andhaira achanak roshan dopahair mein badal gaya ho.

Mein baitha unka chehra hee daikhta reh gaya.

Maira seena bhar aaya aur phir num ho gaya. Mein saktay mein reh gaya thaa, aik aanso bhi nahi nikal saka.

Aaj tuk mein unn ko woh alfaaz bolnay kay liyay apna pura dum lagatay huay daikh sakhtaa hooN.

Aaj tuk woh alfaaz jo woh kehna chahhtee theeN magar puri tarah say keh na sakeeN, mairay undar bustay haiN.

Aaj tuk mein unkay hont aur aankhain parh sakta hooN; aaj tuk mein unki fikar daikh sakhta hooN unki doobti hui aankhon mein.

Mein samajh gaya keh bara ghantay daftar mein kaam karnay kay baad, aur pichlay chund dinoN mein neend na puri honay kai bias, mein paraishaan haal aur chaihray say thaka hua lug raha hooN gaaN.

Woh mujh say kuch nahi maang rahi theeN. Jo unhooN naiN poocha thaa woh apnee aulaad kay liyay hamaisha aik maa kee mohabbat ka dil gurda raha hay or rahay ga, chahay aulaad jitni bhi barhee ho jaye.

Issi liyay Allah taala naiN iss dunya mein Maa ko aik khaas maqaam diya hai.

Issi liyay Uss naiN Maa kay paon kay neechay jannat rakhi hai.

Issi liyay humari pehli ghiza maan ka doodh hota hai.

Jo unhooN nay uss shaam mujh say poocha thaa woh soch kar buss mein andar say hee rota rehta hooN.

Aaankhain num tu hoti hain, kuch aansoo bhi tapaktay haiN phir rukh jaatay haiN, jaisay baraf thorhi dair bahar nikalo tu sataa geeli honaiN lagtee hai purr forun nahi pigaltee.

Shaid behtar hee hai keh kuch ahsaas, kuch dard, kuch tasavur guzray waqt mein hee jamay rehjaeN, taakay tahayat unka saancha mehfooz rahay.

Mairay saath bhi kuch aisa hee hua hai.

Asal mein…..aik azeehatbaksh takleef mein honay kay bawojood, apnee aakhri saans aur himmat ko khainchtay huay, unhooN naiN mujhay kamray mein aatay daikha thaa.

Aur jo fikar unko hamaisha aati thee jub woh mujhay thaka hua ghar mein aata daikhtee theeN, aur jo woh mujh say poochtee theeN, unhooN naiN aik baar phir mujh say wahee poocha thaa:

“Baita, tum naiN kuch khaya bhi hai?”

Advertisements

About Sohaib Alvi

C-Suite Corporate Executive, MBA, Author, Writer, Blogger, Editor, Anchor, TV & Radio Analyst but above all a citizen of the world with a responsibility to live with my personal motto: Have Integrity; Share Knowledge; Create Distinction; Help People.
This entry was posted in Reflections and tagged . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s